Nýr safndiskur í kreppunni - í boði Glitnis

Lagalisti:

1. Hjálpaðu mér upp – NýDönsk

2. It's a hard life – Queen

3. Can't walk away – Herbert Guðmundsson

4. The winner takes it all – ABBA

5. Er nauðsynlegt að skjóta þá – Bubbi Morthens

6. I need a miracle – Fragma

7. Á tjá og tundri – Sálin hans Jóns míns

8. Run to the hills – Iron Maiden

9. Hamingjan er krítarkort – GCD

10. I'm going down – Bruce Springsteen

11. Þau falla enn - Síðan skein sól

12. Ég vil fá að lifa lengur - Todmobile

13. All by myself - Eric Carmen

14. Sirkus Geira Smart - Spilverk þjóðanna

15. Highway to hell – AC/DC

16. Til hamingju Ísland – Silvía Nótt

17. Exodus - Bob Marley

Sjötugur sjóari

Þessi magnaði kappi er sjötugur í dag. Hann gengur undir nafninu Nonni Begga og er trillukarl og harmonikkuleikari sem er búinn að beita svo margar línur um dagana að það hlýtur að nálgast heimsmet. Hann á allavega pottþétt metið í fjölda siglinga út og inn Fáskrúðsfjörð. Nonni byrjaði á sjó 9 ára gamall og er enn að. Myndin er fengin að láni af síðu Jóhönnu Hauks.

Bókaútgáfa blómstrar

Nú fer jólabókaflóðið bráðum að byrja. Því er ekki úr vegi að kynna sér nokkrar nýjar bækur sem eru að koma út og einnig gamlar sem verða endurútgefnar vegna sérstakra aðstæðna í þjóðmálunum. Sumar bækurnar koma aftur út í upprunalegri útgáfu en aðrar endurskrifaðar. Bókunum er oftast skipt í tvo flokka í for-kynningum sem þessari, þykkar og þunnar.

Þykkar:

Handbók í svikamyllum eftir Hannes Smárason. 3500 bls. Útgefandi: Decode.

Nokkur tips handa græðgisfíklum eftir Jón Ásgeir Jóhannesson. 1550 bls. Útgefandi: Baugur Group.

Rise and Fall eftir Björgólf Guðmundsson. 1200 bls. Útgefandi: West Ham.

Ég sagði ykkur þetta! eftir Prófessor Þorvald Gylfason. 10000 bls. Útgefandi: Háskóli Íslands.

Þunnar:

Hvernig getur Ísland orðið ríkasta land í heimi eftir Dr. Hannes Hólmstein. 2 bls. Útgefandi: Frjálshyggja Group.

Reglur fyrir íslenska banka eftir einkavæðinguna eftir Hr. Davíð Oddsson. ¼ bls. Útgefandi: Útvarp Matthildur.

Erlend samningatækni í efnahagsvanda eftir Árna Mathiesen dýralækni. ¾ bls. Útgefandi: Landlæknir.

Hughreysting handa særðri þjóð eftir Ólaf Ragnar Grímsson Forseta. 5 bls. Útgefandi: Skítlegt eðli ehf.

Ný bók - var að koma út

Hugleiðing

Ýmislegt sem menn sögðu og skrifuðu í gamla daga var algjört rugl en sumt voru sannindi sem standast tímans tönn. Hugsuðir og spekúlantar vöruðu fólk við ýmsu í mannlegri hegðun sem væri afar slæmur löstur. Margt af þessu er allt enn í fullu gildi:

Græðgi var í gamla daga sögð ein af dauðasyndunum sjö og fólk forðaðist hana. En nú eru breyttir tímar því þessi ófögnuður er orðinn aðal drifkrafturinn í nútíma vestrænu þjóðfélagi og öllum finnst það bara í fínu lagi. Þjóðfélagið er búið að missa öll tök á græðginni og er að súpa seyðið af því nú síðustu daga.

Stolt virðist vera fylgifiskur græðginnar því nú til dags er sumt fólk svo upptekið af því að afla sér lífsgæða og fínnar stöðu að það má ekki vera að því að ala upp börnin sín því það þarf að fá sér aðeins flottari jeppa í stæðið en nágranninn, eða stærri flatskjá. Sumir vinir fólks verða skyndilega hallærislegir og nýir og flottari vinir eru teknir fram yfir. Sumir myndu frekar vilja deyja en að tapa öllu og verða fátækir. Dramb er falli næst.

Óhóf kemur svo í kjölfarið þar sem sumir sanka endalaust að sér hlutabréfum eða kaupa allt of stór hús og bíla á erlendum lánum og hætta aldrei að taka áhættur til að verða ríkari. Þeirra bíður ekkert nema fall sem óhófið nær tökum á. Það á við um allt sem við gerum og neytum, mat drykk, kynlíf og peninga.  

Losti verður svo til þegar óhófsmenn með of mikið góðæri missa tökin á tilverunni, fara of oft á Goldfinger eða sÓðal eða missa sig í því að eiga endalausan séns í hitt kynið vegna fullra vasa að seðlum.

Öfund bíður svo þeirra sem horfa á hina ríku og flottu velta sér upp úr allsnægtunum. Þeir vilja verða eins, en eru blindaðir af afbrýðisemi. Sem betur fer láta sumir sér nægja að lesa Séð og Heyrt og öfunda fína og flotta stjörnufólkið í litadýrðinni.

Leti segja sumir að sé ástæða þess að hinir öfundsjúku nái ekki árangri.

Reiði blossar svo upp þegar hinir stoltu og gráðugu fara að missa tökin á lífsstílnum og hlutabréfin gufa upp og peningarnir og vinirnir taka að hverfa. Það er oftast einhverjum öðrum að kenna og þá fara sumir að hefna sín og stinga í bök. Ætli það sé ekki það sem bíður efnahagslífsins á næstunni? Reiði er í það minnsta afar útbreidd á Íslandi um þessar mundir.

Tilkynning

Bubbi Morthens hefur skipulagt samkomu á Lækjartorgi klukkan 4 á morgun þar sem allir helstu útrásarvíkingar og fjármálasnillingar landsins verða teknir hver á fætur öðrum og hýddir allsnaktir. Bubbi kóngur ætlar að klæðast böðulsbúning með forláta leðurhettu og mun stjórna hýðingunum með harðri hendi. Fólk er hvatt til að mæta á Lækjartorg og púa á ofursnillingana á bak við efnahagsundrið sem settu landið á hausinn. Viðburðurinn verður í beinni útsendingu á öllum sjónvarpsstöðvum og eftir gjörninginn verða snillingarnir svo hengdir upp á tánum í apabúrum sem verður svo ekið um götur bæjarins á opnum vögnum og um borð í varðskip sem flytur þá norður til Bjarnareyjar í Barentshafi. Þar munu þeir síðan verða látnir dúsa næstu 40 árin.

Ósáttur við bankann

Vísnahornið

Hirðskáldið Ólafur Auðunsson hefur sent vísnahorninu skondinn kveðskap. Þessi skemmtilegi texti er úr safni höfundar og er kominn eitthvað til ára sinna en sennilega hefur hann aldrei átt betur við en einmitt nú. Ritstjóri er að hugsa um að semja lag við kveðskapinn.

 

Nýríki í Ríki.

 

Hátt í rjáfri bankans ég ríki mínu stýri

ég rosalega þéna og lifi nokkuð flott.

Og þó að brátt sé úti, allt mitt ævintýri

ég ek mér þétt í sæti með hlálegt aulaglott.

 

(kór)

Þó ég sé með bústinn belg

og birgðir eigi af víni.

Smygla ég keti af kú og elg

Camel , hest ......og svíni.

 

Kjallarans í myrkri mont-ég geymi-jeppa

meiriháttar tæki svo komist hratt í lax.

Einnig ef að þarf ég til andskotans að skreppa

það ekki dugar honum að senda meil né fax.

 

Ég fermetra af Kjarval á kjarakjörum kaupi

og kem þeim inní hólfið mínum banka í.

Ókeypis ég ferðast og frítt er oft í staupi

ég flakkað hefi víða ..er að því æ og sí.

 

Og ég held í lax með löxum öðrum stórum

og læðist um á fjöllum og aðra refi skýt.

Í sumarhúsi oft á eyrunum við þjórum

öllu þar ég gleymi er í potti hrýt.

 

Já hátt uppí rjáfri ég ríki mínu stýri

rorrandi á bita af hruni gaman hef

Mig kvelur bara eitt og það er dropinn dýr

svo dýra jeppann góða einhverjum ég gef.

 

Hátt í rjáfri einn ég ríki mínu stýri

þó riði allt til falls ég mettan enn mig et.

og þó að brátt sé úti allt mitt ævintýri

ég ek mér til á fjósbitanum meðan að ég get.

 

Nýir eigendur Kirkjusands

Það er einhver draugagangur á Kirkjusandi. Frá byggingu hússins hefur það oft skipt um eigendur og ýmis skilti hangið á því, Sambandið, Íslandsbanki, FBA og hver veit hvað. Í morgun var greinilega kominn enn einn nýr eigandi að húsinu. Fljótlega verður svo komið annað skilti, það er þegar búið að ákveða hvað á að standa á því.

Erfiðir gjalddagar framundan

Hagfræði- og bankasnillingur áratugarins

Rétt í þessu var að ljúka kosningu á hagfræði- og bankasnillingi áratugarins og það kom ekki á óvart það var sjálfur Dabbi kóngur sem hreppti titilinn. Fyrir um áratug þegar hann var fossessráðherra hóf hann mikla herferð sem miðaði að því að selja allar mjólkurkýr landsins til velþóknandi fólks, t.d. voru nokkrir bankar seldir á slikk. Sumir þeirra voru jafnvel borgaðir upp á einu ári eða svo. Skömmu síðar fóru sumir nýríku bankamennirnir svo að skammta sjálfum sér ótæpilega og Dabbi tók þá fáeina þúsundkalla út úr sama banka í mótmælaskyni. Hann tók ekki út neina peninga úr neinum banka þegar hann síðan skammtaði sér ofurlaun og ofur-eftirlaun þegar hann réð svo sjálfan sig í Seðlabankann.

Núna er hann búinn að leysa til sín aftur part af bönkunum með fé okkar skattborgara úr sjóðum Seðlabankans. Er ekki reglan í markaðshagkerfi sú að selja dýrt og kaupa ódýrt? 84 milljörðum var pungað út fyrir Glitni takk fyrir.

Kanarnir vildu ekkert með íslenska Seðlabankann hafa en gerðu samninga við alla hina Norðurlandabankana í síðustu viku. Bússi kóngur sagði fyrir einungis 4 árum þegar Dabbi heimsótti hann "Mr. Oddsson is a friend of mine" En hvar er Bússi vinur Dabba nú? Gat Dabbi ekki hringt í vin sinn og beðið hann að kippa í réttu spottana? Hann hefur nú alveg gert svoleiðis áður, og svo vinnur Bússi við það að kippa í spotta fyrir rétta vini.

Það sem stendur upp úr er að Dabba hefur líklega loks tekist að knésetja hið illa veldi Baugs eftir ítrekaðar tilarunir. Þeir áttu nefnilega stærstan hluta í Glitni og hafa þar af leiðandi tapað gríðarlegu fé í allri ringulreiðinni.

Kúnninn...

...hefur ekki alltaf rétt fyrir sér, það eru starfsmenn Brimborgar alveg með á hreinu. Ég ætla aldrei að eiga viðskipti við þessa skítasjoppu aftur.

Forsaga málsins er sú að við hjónin keyptum á sínum tíma notaðan Ford Focus hjá Brimborg. Maður taldi sig öruggan með að hafa keypt bíl af umboði, en ótrúlegt en satt þá áttuðum við okkur ekki á því fyrr en daginn eftir kaupin að bíllinn átti að vera búinn að fara í skoðun og við nánari athugun í smurbók var líka kominn tími á olíuskipti. Það var nánast eins og maður væri með dónaskap við þá þegar við reyndum að fá þetta í lag hjá umboðinu, það tók nokkra daga. Þar kom einnig í ljós að einhver hafði fengið bílinn "lánaðan" mjög mikið á meðan umboðið átti hann, því á 2 mánuðum hafði bíllinn verið keyrður nokkur þúsund kílómetra og þar af leiðandi enginn veitt því athygli að komið væri að olískiptum og bíllinn bara seldur þannig.

En að aðal málinu. Um ári eftir kaupin lendi ég í því að vera á keyrslu á þjóðvegi 1 rétt hjá Kirkjubæjarklaustri. Þá springur hliðarsætis-loftpúðinn í bílstjórasætinu með slíkum hvelli að það var eins og skotið væri úr haglabyssu við eyrað á mér og rýmið fylltist af reyk, enda eru þessir loftpúðar ekkert annað en sprengjur. Það var einungis lukka ein sem forðaði því að ég endaði hreinlega á hvolfi úti í hrauni. Sem betur fer er ég ekki taugaveiklaður eða hjartveikur eða neitt slíkt, en djöfull brá mér svakalega. Ekki veit ég hvað olli því að púðinn sprakk, djúp hola í veginum sem myndaði svona rosalegt högg eða steinn sem spýttist undir bílinn af miklum krafti eða hver fjandinn það var. Allavega var það bara einn púði sem sprakk, af hverju ekki allir? Og hvar er stór dæld á bílnum eftir högg eða árekstur sem kæmi loftpúðasprengingu af stað?

Ég fer í Brimborg og segi frá þessu. Þar segja þeir þetta aldrei hafa gerst án þess að það hafi komið töluvert högg á bílinn og þvertaka fyrir allt slíkt enda sögðust þeir hafa upprætt þannig mál þar sem eigandi bíls hafði verið að ljúga. Ég fór með það svar. Stuttu síðar lét ég 3 óháða skoðunarmenn hjá Frumherja líta á bílinn. Þeir tóku hann á gryfju og litu á allan undirvagn og allt stellið og sáu auðvitað ýmsar rispur eins og eru á öllum notuðum bílum en ekkert sáu þeir sem gæti hafa orsakað þessi læti þegar loftpúðinn sprakk. En Brimborgarmenn hlusta ekki á slíkt þvaður. Þegar ég fór aftur í umboðið og talaði ég við yfirmann verkstæðis þá sat einn þjónustugúbbinn á meðan á bak við hann og glotti háðslega á meðan við vorum að karpa um bílinn. Sá sem glotti var eflaust að hugsa: "enn einn svindlarinn mættur að rífa kjaft" Þessu lauk þannig að þeir tóku bílinn og mynduðu undirvagninn og skoðuðu. Svarið gat auðvitað ekki orðið neitt annað en það sem það varð. "Ýmsar ákomur á undirvagni" stóð á skýrslu og þar með var umboðið stikkfrí og glæponinn gómaður. Ég var s.s. bara að reyna að svindla á þeim. Það er alveg sama hvaða notaða bíl þeir tækju til skoðunar, þeir myndu alltaf finna einhverjar "ákomur á undirvagni"

Fyrst bíllinn var kominn inn á verkstæði var ég svo vitlaus að biðja þá að gera við þurrkurnar í leiðinni, sem voru komnar í hakk (algjört drasl) en það hefði ég betur látið gera annarsstaðar. Að skipta um þurrkuarm og stöng kostaði heilar 64 þúsund krónur takk fyrir, tók 2-3 tíma. Varð að sjálfsögðu afar ósáttur þegar ég fékk að þessa svimandi tölu frá sölumanninum en hann lækkaði þetta um 5 eða 6 þúsund kall eftir smá stund. Auðvitað létu þeir krimmann borga fullt verð fyrir ómakið að skoða og mynda undirvagninn, ekki fer umboðið að sitja uppi með slíkan kostnað. Það sagði við mig maður á verkstæði úti í bæ þegar ég greindi honum frá viðskiptum mínum við umboðið: "Ef þeir rengja mann ekki þá ræna þeir mann". Brimborg gerðu hvort tveggja.

Ég geri mér grein fyrir því að það er til hellingur af fólki sem reynir að svíkja eins mikið út úr fyrirtækjum og kerfinu og það mögulega getur og sem betur fer er það oftast gómað og látið gjalda. En því miður fáum við hin oft sömu meðferð.

Úr Myndaorðabókinni

Fólk hefur oft í flimtingum að það sé mynd af einhverju eða einhverjum við hlið ákveðins orðs í orðabókum þegar nafnorð eða lýsingarorð bera á góma. Nú er loks búið að gefa út bókina umtöluðu og hér eru nokkrar myndir af handahófi úr Myndaorðabókinni, en Séð og heyrt "stjörnur" eru áberandi á síðum bókarinnar við hlið orðanna.

 

Bimbó (ásdísus siliconus) Slanguryrði sem merkir á engilsaxnesku: "heavyset blonde woman who acts stupid" Glyðruleg kona sem hagar sér eins og tálkvendi. Vinnur við það að koma fram fáklædd og fyllingar úr kísilefnum eru á ýmsum stöðum. Sannkölluð síli-kona.

 

Kvennabósi (fjölnus flagarus) Kvennamaður, kvensamur maður, flagari. Skiptir stöðugt um lagskonur og eltist við kvenfólk út í eitt. Holdgervingur orðsins hefur ósjaldan komist á forsíður slúðurblaða fyrir athæfið og er frægur fyrir það það öðrum fremur.

 

Hrokagikkur (bjössus hrokagikkus) Ráðamaður sem svarar fólki með hroka, fullnýtir valdið út í ystu æsar og túlkar oft á eigin hátt. Enginn má hreyfa andmælum við svörum hans þótt við blasi að hann sé ekki að segja alveg allan sannleikann.

 

 

Hrappur (árnus steliþjófus) Lygilega slyngur smjaðurrefur sem kemst upp með ótrúlegustu hluti árum saman en smokrar sér svo aftur inn á þing eftir að hafa setið í fangelsi fyrir stórfelldan þjófnað frá hinu opinbera.

Þegar rignir...

Það lítur út fyrir að við séum að fá annað rosalegt rigningarhaust. Konur eru (eins og allir vita) óðar í skó og geta því slegið tvær flugur í einu höggi með því að fara í þessa búð á Laugaveginum.

Smokey-Bay

Íslendingar segja alltaf við útlendinga að Reykjavík þýðist sem Smokey-Bay á ensku. Bull. Í ensku er gerður greinarmunur á reyk og gufu en ekki alltaf í íslensku. Smoke=Reykur - Gufa=Steam. Reykurinn sem höfuðborgin er kennd við var að sjálfsögðu gufa. Reykur kemur frá einhverju sem er að brenna og ekki sáu landnámsmennirnir víkina vera að brenna svo að rétt þýðing væri sennilega Steam-bay eða Gufuvík.

Yfirlýsing Seðlabankastjóra

Í morgun var Davíð með yfirlýsingu niðri í Seðlabanka. Myndasmiðurinn Frame-óður Rammi ákvað að vera sömuleiðis með yfirlýsingu. Svona lítur yfir-lýstur Seðlabankastjóri út.