Kúnninn...

...hefur ekki alltaf rétt fyrir sér, það eru starfsmenn Brimborgar alveg með á hreinu. Ég ætla aldrei að eiga viðskipti við þessa skítasjoppu aftur.

Forsaga málsins er sú að við hjónin keyptum á sínum tíma notaðan Ford Focus hjá Brimborg. Maður taldi sig öruggan með að hafa keypt bíl af umboði, en ótrúlegt en satt þá áttuðum við okkur ekki á því fyrr en daginn eftir kaupin að bíllinn átti að vera búinn að fara í skoðun og við nánari athugun í smurbók var líka kominn tími á olíuskipti. Það var nánast eins og maður væri með dónaskap við þá þegar við reyndum að fá þetta í lag hjá umboðinu, það tók nokkra daga. Þar kom einnig í ljós að einhver hafði fengið bílinn "lánaðan" mjög mikið á meðan umboðið átti hann, því á 2 mánuðum hafði bíllinn verið keyrður nokkur þúsund kílómetra og þar af leiðandi enginn veitt því athygli að komið væri að olískiptum og bíllinn bara seldur þannig.

En að aðal málinu. Um ári eftir kaupin lendi ég í því að vera á keyrslu á þjóðvegi 1 rétt hjá Kirkjubæjarklaustri. Þá springur hliðarsætis-loftpúðinn í bílstjórasætinu með slíkum hvelli að það var eins og skotið væri úr haglabyssu við eyrað á mér og rýmið fylltist af reyk, enda eru þessir loftpúðar ekkert annað en sprengjur. Það var einungis lukka ein sem forðaði því að ég endaði hreinlega á hvolfi úti í hrauni. Sem betur fer er ég ekki taugaveiklaður eða hjartveikur eða neitt slíkt, en djöfull brá mér svakalega. Ekki veit ég hvað olli því að púðinn sprakk, djúp hola í veginum sem myndaði svona rosalegt högg eða steinn sem spýttist undir bílinn af miklum krafti eða hver fjandinn það var. Allavega var það bara einn púði sem sprakk, af hverju ekki allir? Og hvar er stór dæld á bílnum eftir högg eða árekstur sem kæmi loftpúðasprengingu af stað?

Ég fer í Brimborg og segi frá þessu. Þar segja þeir þetta aldrei hafa gerst án þess að það hafi komið töluvert högg á bílinn og þvertaka fyrir allt slíkt enda sögðust þeir hafa upprætt þannig mál þar sem eigandi bíls hafði verið að ljúga. Ég fór með það svar. Stuttu síðar lét ég 3 óháða skoðunarmenn hjá Frumherja líta á bílinn. Þeir tóku hann á gryfju og litu á allan undirvagn og allt stellið og sáu auðvitað ýmsar rispur eins og eru á öllum notuðum bílum en ekkert sáu þeir sem gæti hafa orsakað þessi læti þegar loftpúðinn sprakk. En Brimborgarmenn hlusta ekki á slíkt þvaður. Þegar ég fór aftur í umboðið og talaði ég við yfirmann verkstæðis þá sat einn þjónustugúbbinn á meðan á bak við hann og glotti háðslega á meðan við vorum að karpa um bílinn. Sá sem glotti var eflaust að hugsa: "enn einn svindlarinn mættur að rífa kjaft" Þessu lauk þannig að þeir tóku bílinn og mynduðu undirvagninn og skoðuðu. Svarið gat auðvitað ekki orðið neitt annað en það sem það varð. "Ýmsar ákomur á undirvagni" stóð á skýrslu og þar með var umboðið stikkfrí og glæponinn gómaður. Ég var s.s. bara að reyna að svindla á þeim. Það er alveg sama hvaða notaða bíl þeir tækju til skoðunar, þeir myndu alltaf finna einhverjar "ákomur á undirvagni"

Fyrst bíllinn var kominn inn á verkstæði var ég svo vitlaus að biðja þá að gera við þurrkurnar í leiðinni, sem voru komnar í hakk (algjört drasl) en það hefði ég betur látið gera annarsstaðar. Að skipta um þurrkuarm og stöng kostaði heilar 64 þúsund krónur takk fyrir, tók 2-3 tíma. Varð að sjálfsögðu afar ósáttur þegar ég fékk að þessa svimandi tölu frá sölumanninum en hann lækkaði þetta um 5 eða 6 þúsund kall eftir smá stund. Auðvitað létu þeir krimmann borga fullt verð fyrir ómakið að skoða og mynda undirvagninn, ekki fer umboðið að sitja uppi með slíkan kostnað. Það sagði við mig maður á verkstæði úti í bæ þegar ég greindi honum frá viðskiptum mínum við umboðið: "Ef þeir rengja mann ekki þá ræna þeir mann". Brimborg gerðu hvort tveggja.

Ég geri mér grein fyrir því að það er til hellingur af fólki sem reynir að svíkja eins mikið út úr fyrirtækjum og kerfinu og það mögulega getur og sem betur fer er það oftast gómað og látið gjalda. En því miður fáum við hin oft sömu meðferð.

Athugasemdir

[Brynja Svanhvít Lúðvíksdóttir (IP-tala skráð) 25.9.2008 kl. 20:12]

Þetta er ansi ógeðfelld saga,ég fæ bara hroll.Það er ótrúlegt hvað neytendur í þessu landi fá að smakka á'ðí.Er ekki Brimborg ''öruggur staður til að vera á''?

Þetta með Árna Johnsen var grín:)Hann er ekki skítseiði heldur sníkjudýrið sem er á skítseiðinu:)

Gangi ykkur vel með bílhelvítið.

[Guðmundur Bergkvist, 25.9.2008 kl. 22:58]

Rosalega öruggur staður. Það er allavega öruggt að maður verður látinn borga slatta.

[Brynja Svanhvít Lúðvíksdóttir (IP-tala skráð) 25.9.2008 kl. 23:49]

Jáh,þau gera út á öryggið.....fyrir sinn eigin rass!!Apaheilar!

[Sigurgeir Orri Sigurgeirsson, 29.9.2008 kl. 08:33]

Þetta er svakalegt! Fyrirfram hefði maður talið að það borgaði sig að kaupa notaða bíla af umboðum, en það virðist ekki vera svo. Gott að fá svona viðvörun.

Ég ákvað einhvern tíma að kaupa aldrei neitt af Brimborg vegna auglýsinafrasans um öruggan stað til að vera á; hann er svo hallærislegur, bjánalegur og yfirborðskenndur að þeir sem ákveða að hafa slíkan texta í auglýsingum sínum, hljóta að vera hallærislegir, bjánalegir og yfirborðskenndir sjálfir. Nú er það komið á daginn.