Ég ætla aldrei að kvarta aftur....

....yfir þvi að eitthvað sé erfitt eða ómögulegt í vinnunni. Það er margt fólk sem hefur það verra í sinni vinnu.

Tonn á móti tonni

Nú eru bara 2 eftir í þingflokki Frjálslyndra, spurning hvort þeir séu orðnir þátttakendur í Survivor - Last man standing. Þrátt fyrir að flokkurinn virðist þjást af sjálfseyðingarhvöt þessa dagana hefur meðalþyngdin í flokknum hækkað til muna eftir að Sleggjan yfirgaf þá nú síðast. Enn eitt partíið að baki hjá þeirri flokkamellu og Jón er kominn heim! Eftir eru aðal þungavigtarmennirnir í flokknum, fyrrverandi skipstjórar sem eru það miklir áhugamenn um kvótakerfið að þeir virðast ekki hafa áhuga á neinu öðru í störfum þingsins. Þeir ku sérstaklega vera hrifnir af hugtakinu tonn á móti tonni. Hrútafýlan hefur lengi loðað við flokkinn og konur ekki verið hátt skrifaðar hjá þessum köppum, en þær hafa samt þótt vera ansi góðar í að bera fram kaffi og kökur á fundum flokksins.

Spurningin sem vantaði í viðtalið

"Að lokum Davíð, finnst þér þú enga ábyrgð bera á því hvernig komið er fyrir þjóðarbúinu þegar litið er á þá staðreynd að það varst þú sem varst forsætisráðherra þjóðarinnar í 14 ár? Undir þinni forystu var algerri ofurfrjálshyggju hrundið af stokkunum, einkavæðing bankanna var framkvæmd með gassagangi og látum og slakað mjög á reglugerðum í kringum fjármálafyrirtæki því þannig gætu allir orðið ríkir. Allt var gert til að draumurinn um hina íslensku fjármálamiðstöð gæti orðið að veruleika, með minnsta gjaldmiðil í heimi í farteskinu. Má kannski segja að þú sért Doktor Frankenstein sem skapaði skrímsli en missti svo algera stjórn á því og hóf svo vonlausa baráttu við að reyna að ná tökunum aftur, en skrímslið var fullkomlega stjórnlaust og er búið að valda gríðarlegu og óbætanlegu tjóni?"

Sturla handtekinn aftur

Sturla Jónsson vörubílstjóri var aftur handtekinn í morgun fyrir utan Seðlabankann með nýjan þokulúður sem hann hefur útbúið í mótmælabaráttu sinni. Þessi mynd var tekin rétt áður en lögreglan mætti og handtók kauða.

Nú skilur minn hvorki upp né niður

Hvað er með þennan Alþjóða Gjaldeyrissjóð? Getur einhver sagt mér hvað það er sem þeir hafa að fela, ef það er eitthvað? Af hverju er það trúnaðarmál hvað er í samningnum sem þeir gerðu við Ísland sem var komið fram á bjargbrúnina? Margir segja að Alþjóða Gjaldeyrissjóðurinn sé bara bölvuð glæpastofnun og það sé ein af mörgum ástæðum fyrir því að Ísland í svona vondum málum. Sumir segja að AGS sé búinn að níðast á smáríkjum sem þeir hafa hjálpað.

Íslensk bjórframleiðsla í Danaveldi

Ég hef hér á síðunni sagt áður frá honum Freysa. Hann er læknanemi og mikill bjóráhugamaður sem býr í Danmörku ásamt fjölskyldu sinni. Freysi heldur úti skemmtilegri síðu sem kallast bjórbók þar sem gefur að líta ansi skemmtilegan fróðleik um bjór. Hann hefur einnig verið að experimenta með að búa til eigin bjór, og heldur úti sér síðu fyrir þá framleiðslu. Hann hefur meira að segja fengið danskan vin sinn sem er snilldar teiknari til að hanna miða á bjórinn. Miklar pælingar eru á bak við bruggun og innihald og segir m.a. í umfjöllun um eina tegundina: "Bjórinn er ætlaður sem fyrr að þjóna þeim tilgangi að vera mönnum huggun á erfiðum tímun en einnig veita þjóðinni innblástur, andlegan stuðning og nýjar hugmyndir um hvernig leysa má sum vandamál sem hvílt hafa á þjóðinni lengi."  Nöfnin á bjórunum eru með skemmtilegum tilvísunum í kreppuna og önnur íslensk samtímamál. Hérna eru sýnishorn af bjórflöskumiðum Freysa í nanobrugghúsinu nIcebrew sem Freysi segir enn aðeins vera staðsett í eldhúsinu hjá honum.

Survivor Central bank

Nú er í sýningu á sjónvarpsstöðinni ÍNN alveg frábær raunveruleikaþáttur í Survivor þáttaröðinni, en þessi sería er með Big-brother ívafi. Í þættinum geta sjónvarpsáhorfendur fylgst baráttu aðal starfsmanna Seðlabankans berjast fyrir starfi sínu og verða síðastir frá borði. Hægt er að fylgjast með baráttunni úr öllum 500 öryggismyndavélum byggingarinnar í þessum ótrúlegu sjónvarpsþáttum. Nú eru bara 2 þátttakendur eftir og úrslitaþátturinn verður æsispennandi, og allt í beinni útsendingu. Sumir telja þó að annar tveggja keppenda sem eftir eru sé mun klókari en hinn og sá muni pottþétt verða síðastur út, enda þekktur klækjarefur.

Ekkert nútíma vísindakjaftæði takk

Fékk alveg magnaðan bækling inn um bréfalúguna í dag. Ekki alveg með á hreinu hver sendandinn er, það er eitthvað ógreinilegt, allavega er sá hinn sami trúaður og boðar dómsdag. Sýnist þetta vera einhver hjón í Noregi sem senda þetta. En jæja hvað um það, þetta er alveg ótrúlegt sem stendur þarna. Það er sko alltaf verið að blekkja fólk eins og við vitum, svoleiðis heilu skólakerfin og margar margar þjóðir gera það vísvitandi. Það verður einhver að stoppa þessar endalausu blekkingar. Þetta stendur meðal annars í bæklingnum:

"Það er sorglegt að til sé fólk sem er hætt að trúa því að Guð er skaparinn. Á nítjándu öld kom Charles Darwin fram með kenninguna um uppruna tegundanna. Því miður hafa margir látið blekkjast af þessari manngerðu kenningu um þróun, sem er stöðugt lætt inn í bækur og kennsluefni grunnskóla og háskóla."

Já svo skilst mér líka að þessi David Attenborough sé bara loddari sem er sífellt að ljúga að fólki einhverju rugli um dýr og náttúru í gegnum sjónvarpið. Við vitum alveg að þetta varð ekkert til svona. Það eru sko engar manngerðar kenningar sem standa í Biblíunni, bara hrein og klár sannindi sem Guð sendi okkur, engin nútíma bull-vísindi.

Fyrir áhugasama um heimsendi má finna frekari upplýsingar um innihald bæklingsins hjá íslenska tengiliðnum [e-mail] og hjá þessum norsku ofurtrúboðum á www.endtime.net

Sjallar mótmæla

Fyrir framan Alþingishúsið við Austurvöll eru nú samankomnir fjölmargir Sjálfstæðismenn til að mótmæla rauðu kommúnistabyltingunni sem þeir segja að sé hafin í landinu. Sjöllunum er heitt í hamsi og þeir hrópa í sífellu "vanhæf vinstristjórn!" ásamt því að framkalla mikil óhljóð og skrölt með því að hrista fínu skartgripina og Rolex úrin sín. Sumir þeirra eru jafnvel farnir að tromma á húddin á jeppunum og sportbílunum sínum.

Joð og eyra

Það eru margir sem kvíða vinstri stjórn í landinu og einnig margir sem hlakka til. Steingrímur Joð mætti til stjórnarmyndunarfundar í morgun og Raxi ljósmyndari á Mogganum tók mynd af Steingrími og eitthvað fannst honum líka eyrað á mér vera heppilegt myndefni á sömu mynd.

Eins og sagt í gær

"Owners of capital will stimulate working class to buy more and more of expensive goods, houses and technology, pushing them to take more and more expensive credits, until their debt becomes unbearable. The unpaid debt will lead to bankruptcy of banks, which will have to be nationalized, and State will have to take the road which will eventually lead to communism."

-Karl Marx, 1867

Myndir af mótmælum

Brandaraflokkurinn

Ég er alinn upp í Framsóknarbæli úti á landi þar sem Kaupfélagið réði (og ræður enn) öllu. Þar ráða gamlar hugsjónir enn ferðinni. Samfélagsleg ábyrgð um að allir hafi vinnu við að framleiða eitthvað verðmætt virðist enn vera aðal málið. Þessar hugsjónir þóttu orðnar gamaldags í þjóðfélaginu og úr sér gengnar og jafnvel gert grín að þeim í höfuðborginni og víðar. Meira að segja þingmaður lét út úr sér einhvern tímann í gróðærinu að gömlu framleiðslugreinarnar væru bara algert aukaatriði. Spákaupmennska með loft og ímyndaðar tölur voru framtíðin. Þrátt fyrir þessar hugsjónir hefur mér aldrei tekist að kjósa Framsóknarflokkinn og er ekki viss um að ég eigi það eftir, nema þá kannski í einhverju gríni.

Á laugardaginn fékk ég það skemmtilega verkefni að vera sendur á flokksþing gamla farsakennda bændaflokksins sem hefur verið upptekinn við eigið niðurrif og skandala að undanförnu en er nú sannfærður um bjarta framtíð. Þarna voru mörg gamalkunn Kaupfélags-andlit saman komin í salnum með vonarneista í augum um að finna nýjan og ferskan foringja. Nýtt upphaf var í augsýn. Nú átti sko að láta þjóðina vita að flokkurinn er risinn úr öskustónni og hann ætlar að verða stór og sterkur á ný og traustsins verður. Maður bókstaflega kafaði í gegnum andrúmsloft eftirvæntingar og bjartsýni og eftir samtöl við nokkra gamla kunningja utan af landi í salnum þá mat ég það svo að hin nýja og óspillta vonarstjarna og fyrrverandi RÚV fréttamaður, Simmi Gunnlaugs myndi hreppa stólinn.

Formannskandídatinn hélt sína framboðsræðu og sagði að nú myndi fólk streyma í flokkinn og að Frammarar hefðu alltaf trúað því að aðal málið væri að framleiða eitthvað raunverulegt og viðskipti með ímyndað loft væru ekki það sem Framsókn hefði trúað á. Það var nú engin slík stemmning í gangi í flokknum í stjórnartíð einkavæðingar og græðgi með íhaldinu, eða hvað? Ég varð að halda fyrir munninn til að hósta ekki og ræskja mig meðan ég skimaði um salinn. Einkavæðingar-Valla á Lómatjörn horfði í gaupnir sér en hvergi voru sjáanlegir Finnur gráðugi og moldríkir félagar hans. Óli í Samskip var líka upptekinn við annað og merkilegra.

Svo steig gamli brandarakallinn Guðni upp í ræðustól til að taka við heiðursblómum og hefja upp RRRaust sína í síðasta sinn við flokksmenn. Á því augnabliki varð mér ljóst hvað það er gríðarlegur sjónarsviptir af Guðna af hinum opinbera vetttvangi. Ég sakna hans. Valla á Lómatjörn rétti Guðna fallegan vönd með afskornum blómum og kyssti hann kurteisislega á kinnina. Svo sagði Guðni í miðri ræðu: "Framsóknarflokkurinn þarf að rísa og blómstra eins og þessi blóm" Blómin eru sennilega orðin ansi visin og slöpp í stofunni heima á Selfossi nú 2 dögum síðar.

Valla afhenti næst bjartsýnisverðlaun flokksins. Ég taldi fyrir víst að flokkurinn fengi þau bara sjálfur fyrir alla bjartsýnina um að verða nú aftur tekinn alvarlega og í fullorðinna tölu eftir eigin niðurlægingu undanfarið. Farsinn blossaði svo aftur upp fyrir alvöru þegar nýr formaður var "réttilega kosinn" Í fagnaðarlátunum kom fyrrverandi sláturhússtjóri austan af Héraði með tárin í augunum og faðmaði Sigmund eins og hann væri gamall vinur hans. Enn einn formaðurinn var kosinn og annar varð kóngur um stund. 10 mínútur sem formaður er sennilega heimsmet. Sex formenn á 2 og hálfu ári er líka pottþétt Íslandsmet. Í mínum huga er Framsókn ennþá brandaraflokkur Íslands sem heldur uppi stuðinu. Hvar væri grínið og glensið án þeirra?

Eiríkur þegir loksins

Margur hefur lent í orðaskaki við Eirík Stefánsson í gegnum tíðina og þeir sem hann þekkja vita að kappinn þegir sjaldnast. Hann var með táknrænan gjörning á mótmælafundinum á Austurvelli í dag og líklega hefði einhverjum fundist að hann hefði átt að fá sér þetta á munninn fyrir mörgum árum.

Gandalfur kemur vitinu fyrir Davíð

Íslensk norn gekk fyrir skömmu á fund Davíðs í Seðlabankanum og reyndi að koma vitinu fyrir hann. Ekki virðist það hafa skilað neinum árangri. Hérna sýnir hins vegar Gandalfur galdrakall okkur hvernig á að gera þetta.