Slefað og Sleikt

Þá er komið að nýjum lið hér á síðunni sem kallast Slefað og Sleikt. Þetta eru sjóðheitar skúbb-fréttir frá leynilegu slúðurblaði sem kallar sig "Slefað og Sleikt".

-Samkvæmt fréttum s.l. viku keypti nýkvænti öðlingurinn Jon Aus Gehr hin mögru hlutabréf sem Nesi Smára átti eftir í FL Gubb og hefur hann nú potað fasteignahluta Baugs inn um afturendann á félaginu til að eignast Icelandair með húð og hári. Nú á hann næstum allt Ísland.

En Jon Aus Gehr lætur ekki staðar numið þar. Samkvæmt heimildum Slefað og Sleikt vill Jóhannes faðir hans líka bjóða landsmönnum upp á mismunandi flugferðir á sama hátt og þeir feðgar bjóða upp á mismunandi verslanir og ku feðgarnir vera að stofna lággjaldaflugfélag sem kallast Bonus-Air, en það er ætlað fyrir sama þjóðfélagshópinn og verslar í Bónus búðunum. Þeir eru víst búnir að kaupa nokkrar hráar fraktvélar sem fluttu áður dýrafóður í þróunarlöndunum, engin sæti að taka óþarfa pláss í vélunum og fólk getur bara legið þar sem því sýnist, ógeðslega hagkvæmt. Og þá geta öryrkjar og ríkisstarfsmenn loksins komist til útlanda líka. Viðskiptamódelið mun líta sirka svona út:

Hagkaup, Icelandair – Skemmtilegast og dýrast. Hentugt fyrir þá sem eiga skítnógan péníng.

Bónus, Bonus-Air – Hrátt og skítbillegt. Fínt fyrir fátæklingana.

 

En Jon Aus Gehr og faðir hans vilja víst líka kaupa flugstöðina á Keflavíkurflugvelli og breyta henni í verslanamiðstöð. Leifskringla, hljómar bara vel. Enn eitt mollið í eigu Baugs, fullt af verslunum og fyrirtækjum -í eigu BAUGS. Ekki lækkar okurverðið í Fríhöfninni við það...

Athugasemdir

[Sigurgeir Orri Sigurgeirsson, 11.12.2007 kl. 18:10]

Tímaritið Slefað og skeint hefur höfðað höfundarréttarmál gegn Slefað og sleikt vegna of mikilla líkinda milli nafna tímaritanna. Telur Slefað og skeint að Slefað og sleikt taki markaðshlutdeild af Slefað og skeint með þessu háttarlagi. Talsmaður Slefað og skeint hefur ekkert á móti samkeppni, en hún veður að vera heiðarleg. Slefað og sleikt eftirlíkingin er svipað ósvífin og þegar Séð og heyrt stældi Se og Hör í einu og öllu nema tungumáli, að mati talsmanns Slefað og skeint. Farið hefur verið fram á lögbann á útgáfu Slefað og sleikt meðan dómstólar kveða upp úr með lögmæti nafnsins.

[Guðmundur Bergkvist, 12.12.2007 kl. 09:33]

Tímaritið Slefað og Skeint hefur ekki enn sýnt fram á það sé tímarit og það kemur hvergi fram hér á síðunni að Slefað og Sleikt sé tímarit, einungis gríndálkur á bloggsíðu, ritstjóri fagnar þó að hinn frægi Sigurgeir Orri lesi síðuna.