Þáttagefur mættur til byggða

Í síðustu viku kom all sérstakur jólasveinn til byggða og ku sveinki vera sá fjórtándi í röðinni og heitir hann Þáttagefur. Þetta er sko enginn venjulegur jólasveinn, moldríkur sveinki sem er klæddur í svart-teinóttan búning og kom hann til að hitta nýja jólasveinavini sína hjá RÚV og gefa þeim fullan poka af nýjum sjónvarpsþáttum því hann var í svo obbosslega góðu skapi. Þáttagefur sló þó varnagla og sagði við tilefnið að það væru að vísu bara óáteknar vídeospólur í pokanum ásamt nokkrum seðlabúntum sem RÚV-jólasveinarnir eiga síðan að útdeila til nokkurra vídeokrakka úti í bæ svo að þeir geti búið til alveg splunkunýja þætti fyrir þá til að sýna á imbakassaflatskjám Íslendinga. Á myndinni með Þáttagef eru Launasníkir og Rosagaur sælir á svip eftir rausnarlegar gjafir teinótta jólasveinsins.