Brennd andlit á haustin

Nú er sláturtíðin hafin og Pólverjarnir eru byrjaðir að skjóta lömbin á fullu. Það er af sem áður var þegar Ásta í Hólagerði og Eiríkur í Hólmatungu sáu sjálf um að vinna í sláturhúsunum á haustin. Í þá daga borðuðu allir slátur og svið en nútímafólk lítur varla við þessum viðbjóði, enda eru svið bara sinar, skinn og augu sem búið er að kveikja í.

Þegar ég var lítill pjakkur úti á landi fyrir langa löngu var sviðalykt úr hverjum bílskúr á haustin enda nánast skylda að kaupa hausa í Kaupfélaginu og svíða sjálfur. Eitt sinn var hengd upp ansi skondin auglýsing í Kaupfélagi Fáskrúðsfirðinga sem á stóð:

TIL SÖLU SVIÐIN SVIÐ OG ÓSVIÐIN SVIÐ..... 

Uppnám í höfuðstöðvum Sky Sports

Uppi varð fótur og fit í höfuðstöðvum Sky Sports á Englandi eftir landsleik Íslendinga og Norður-Íra, þegar tökumaður RÚV birtist óvænt á skjám þeirra í beinni útsendingu með míkrófón merktan þeim. Yfirmenn Sky Sports munu hafa gengið af göflunum og hringdu fjölda símtala og vildu ólmir fá að vita hvaða glæsimenni þarna var á ferð. Sögur herma að GSM sími tökumannsins hafi ekki stoppað síðustu daga og að Sky Sports munu vera með feitt samningstilboð í huga.

Ameríka! -sem íslendingum finnst skemmtilegast að apa eftir.

Sá í sjónvarpinu auglýsingu sem lesin var á amerískri ensku (ekki með texta) þar sem auglýstar voru amerískar vörur í verslunum Hagkaupa. Einmitt það sem vantaði, meiri amerísk áhrif í íslenskt þjóðfélag. Það er bara alls ekki nóg af þessu. MEIRI AMERÍSK ÁHRIF!

Legg til að við sækjum frekar um að verða fylki í USA frekar en eitthvað Evrópudót, það er hvort eð er ekkert töff.

Síðustu mínútur lífsins

Flugvél flaug í gegnum talsvert óveður. Ókyrrðin var mikil og ekki skánaði ástandið þegar eldingu laust niður í annan vænginn. Ein kona tapaði sér alveg. Hún stóð upp fremst í vélinni og öskraði "Ég er of ung til að deyja!!". Síðan kallaði hún "ef ég á að deyja núna þá vil ég að síðustu mínútur mínar í þessu jarðlífi verði minnisverðar. Er einhver hér í flugvélinni sem getur látið mér líða eins og sannri konu?"Þá sló á þögn í vélinni og fólkið starði á örvæntingarfullu konuna fremst í vélinni. þá stóð karlmaður frá Texas upp aftarlega í vélinni. Hann var myndarlegur, hávaxinn, vel vaxinn. Hann gekk rólega fram ganginn og byrjaði að hneppa frá sér skyrtunni, einni tölu í einu. Enginn annar hreyfði sig. Hann fór úr skyrtunni og hnyklaði brjóstvöðvana. Hún tók andköf...  Þá, sagði hann...

"Straujaðu þessa og færðu mér síðan bjór".

Allt fyrir Evruna

Stórfyrirtækin á Íslandi virðast vera farin að stjórna þróuninni í þá átt að kasta Krónunni í ruslið og taka upp Evru. Viðskiptaráðherra er með þeim í liði og mun varla líða á löngu þar til þeir koma á myntbreytingu. En Dabbi kóngur í $eðlabankanum er á móti því, þá er engin þörf lengur fyrir fína fína djobbið sem hann réð sjálfan sig í.

Páll Óskar er örugglega hlynntur þessu, hann er nú svo international. Þegar hann kynnti og söng fyrir Kápþing í Laugardalnum í sumar hikaði kappinn ekki við að breyta textanum á nýjasta hommasmellinum sínum og söng "Kaupþing er international"

Er ekki lag fyrir ríku kallana í Actavis, Straumi Burðarás eða jafnvel einhverjum bankanum að gauka nokkrum Evrum að Palla og fá hann til að breyta vinsælasta lagi ársins og gefa það bara út aftur og hafa áhrif. Þetta er alveg rakið dæmi, bara að breyta því smá:

"Allt fyrir Evruna, eina sem aldrei nóg er af, ég segi út með Krónu, inn með Evruna"

Stjörnuvæðing

Í Fréttablaðinu var grein undir fyrirsögninni "Stórstjörnur í spurningaþætti RÚV". Maður bjóst við að þarna væri átt við að frægasta fólk heims væri á leiðinni á klakann, en nei: Stórstjörnurnar voru engar aðrar en Einar Ágúst, Fjölnir Þorgeirs, Þorgrímur Þráins og Ólína Þorvarðar. Ef þetta eru stórstjörnur þá er ég Páfinn. Hef lesið um þessar persónur og séð í sjónvarpi nokkrum sinnum á síðustu árum. Stórstjörnur- minn rass!

Það hefur verið lenska á Íslandi undanfarin ár að skrifa um allskonar fólk í blöð og tímarit og kalla þau stjörnur. Ástandið er alltaf að versna og sumt þetta fólk þarf ekki að hafa sést nema 2-3 skipti á skjánum eða jafnvel nokkrar myndir birst í blöðum eða heyrst í útvarpi í fáein skipti og þá eru þau orðin rosa stjörnur samkvæmt kjaftasögublöðunum. "Sjónvarpsstjarnan Gunni kaupir íbúð" og svo er mynd af Gunna brosandi út að eyrum með gulri stjörnu í horninu sem stendur í "Sjónvarpsstjarna"

Menntaskólaneminn Gunni hefur staðið fyrir framan vídeokameru í 2 skipti og bullað einhverja steypu sem meikar engan sens, og skyndilega er hann orðinn stjarna í þættinum "Váááá!" á sjónvarpsstöðinni Sirkus þar sem hann tekur líka viðtöl við aðra framhaldsskólanema í heitum potti með bjór í hönd í sumarbústað, og Gilsi vinur hans tekur allt upp á litla vídeokameru sem þeir fengu lánaða hjá pabba hans.

 Stundum þurfa "stjörnurnar" ekki einu sinni að hafa gert nokkurn skapaðan hlut. Það hefur kannski bara verið send út tilkynning um að þær verði með einhvern ómerkilegan þátt á skjánum næsta vetur og þá er Séð og Heyrt strax farið að froðufella yfir nýstirnunum.

Spámaður í eigin landi

Tónleikarnir á Laugardalsvelli um daginn kostuðu Kaupþing banka sirka það sem þeir græða á dag í FIT kostnað, sem varla stenst lög, en það er önnur saga. Öll helgin var raunar eins og pissukeppni bankanna, hverjir væru nú flottastir á því. En eftir helgina talaði almenningur eiginlega bara um það hvað Stuðmenn voru leiðinlegir á Laugardalsvelli og var það sosum alveg rétt, skelfilegir voru þeir. Vælon voru vibbi og Lúxor hreint gubb, Helgi Björns náði ekki andanum á sviðinu og Andrea Gylfa var fölsk, kannski var það nýja stellinu að kenna.

En Bubbi lét bankann líka kaupa sig á sviðið og var alveg ágætur þótt hann hefði mátt sleppa þessu "jeeee, jeeee, jóóóó-jóóóó" sem krádið svo endurtók. Fyrrum alþýðusöngvarinn gerðist pólitískur eins og oft áður. Hann lýsti því yfir í Laugardalnum (bak við risastór sólgleraugu að vanda) að það ætti að reka nokkra ráðherra, gjaldkerarnir í Kaupþingi yrðu reknir fyrir minni afglöp en þeir hafa afrekað.

Þegar Bubbi var ungur alþýðusöngvari fyrir mörgum mörgum árum orti hann mikið um landsbyggðina og verkalýðinn. Sumum fannst að textarnir hans væru lélegir, en annað hefur komið á daginn því yrkisefnið var ekki aðeins tíðarandinn, heldur virðist þetta einnig hafa verið einskonar framtíðarsýn. Þrátt fyrir að Bubbi hefði meiri áhuga á því að glamra á gítar og dópa og slást en að vinna í fiskinum, þá hitti hann oft naglann á höfuðið á árum áður. "Enn koma tómir bátarnir og bræðslan stendur auð. Baráttan er vonlaus þegar miðin eru dauð" Nú til dags er enginn kvóti lengur til og bátarnir því tómir eða farnir og bræðslurnar margar ónýtar því verkalýðs- og landsbyggðarpakkið hefur nánast ekkert leyfi til að veiða fisk lengur. "Jakkaklæddir menn" sem margir eru fluttir úr landi eiga fiskinn þar sem hann syndir á 100 faðma dýpi í hafinu. Sjávarþorpin tæmast smátt og smátt og flestir eru farnir "suður á bankanna vald" þar sem "arðræninginn situr og hlær".

Spurning hvort Bubbi hafi séð fyrir að ævistarf hans myndi verða síðar í eigu arðræningja..

Þrífarar

Skógræktarfasismi

Margir skógræktarmenn virðast vera haldnir þeirri villutrú að skógar og tré séu hið eina sanna líf. Þeir eru svo uppteknir af ágæti trjáa að það má ekki í einu orði gagnrýna neitt sem að þeim snýr. Votlendi sem verður að skógi er einungis af hinu góða og berir móar eiga helst ekki að sjást í landinu í framtíðinni. Tré á hvern auðan mel og þúfu. Skógræktarmenn verða fokvondir þegar einhver dirfist að efast um að skógar eigi að vera allsstaðar og skrifa greinar og hringja og hundskamma þá sem eru ekki eins sannfærðir. Ég sjálfur hef ekkert á móti skógum, þeir eru fallegir en eiga bara ekki allsstaðar við.

     Þetta blessaða Kolviðardæmi er satt að segja eins og að prumpa upp í vindinn, "borgaðu bara fyrir fáeinar hríslur og þá er í lagi að bruna á 8 sílindra jeppanum um allar koppagrundir með góða samvisku". Af hverjum þremur trjáplöntum sem eru gróðursettar verða sennilega bara um ein til tvær að alvöru trjám og það þurfa að líða margir tugir ára áður en trén verða orðin nógu stór til að gera eitthvað gagn, þ.e. að jafna út kolefnin sem við spúum út. Hlýnun jarðar er nú þegar orðin það mikil að við breytum afskaplega litlu á litla Íslandi með nokkrum græðlingum, og svo verða bensín- og dísilbílar löngu útdauðir þegar þessi Kolviðartré verða loksins orðin nothæf. En fyrirtækin dæla út Kolviðarauglýsingum eins og óð séu og bjóða fólki að borga nú endilega meira fyrir bílinn eða flugferðina. Nei takk, held ekki..

     En hvar eru Rokkskógarnir? Það var nú ein dellan fyrir nokkrum árum. Einhverjir músíkantar tóku sig saman og stofnuðu voða flott verkefni og rokkuðu og róluðu á tónleikum til að hægt væri að gróðursetja tré. Það hefur enginn séð þessa skóga ennþá, ekki einu sinni litla græðlinga sem kenndir eru við rokk. Auglýsi hér með eftir þeim.

Nei, nú er mælirinn fullur.....

....Þegar ég er nú byrjaður að blogga. En það er víst enginn maður með mönnum í nútíma þjóðfélagi nema hann bloggi, og sé helst pólitískur og beittur. Landið er orðið fullt af sjálfskipuðum fréttastofum í formi bloggsíðna þar sem allir keppast um að fá sem flestar flettingar eins og fjölmiðlar sem keppa um "ratings". Nýlega hitti ég mann (vinnu minnar vegna) sem á vélsmiðjuna sem sér um endurbætur á Grímseyjar-ævintýra-ferjunni. Kallgreyið var búinn að fá sig fullsaddan af allskonar fólki sem hafði hringt í hann dögum saman og spurt spjörunum úr, rétt eins og um alvöru fréttamenn væri að ræða. "Nei ég er bara að skrifa á bloggsíðuna mína um ferjumálið og vildi fá réttar upplýsingar frá fyrstu hendi"...  Enginn friður í vinnunni og kallinn var eiginlega hættur að svara símanum og var orðinn verulega pirraður á þessum ágangi "blaðamanna".